Dualar

Şabaniyyə münacatı

Həzrət Əlinin (ə) şaban ayında Allahla etdiyi raz-niyaz dua kitablarına "Şabaniyyə münacatı" adı ilə düşüb. Bildirilir ki, bütün imamlar bu sözlərlə şaban ayında Allahla münacat ediblər. Lakin, dərin irfani məzmunu və mənəvi təsiri səbəbindən Şabaniyyə münacatını ilin istənilən vaxtında oxumaq tövsiyə olunur.

Allahla mənəvi rabitə yaradan bu əzəmətli dua ilahi mərifət və eşq axtaranların yolunu aydınlatır. Burada özünütanıma, raz-niyaz ədəbi, bəndəlik fəlsəfəsi, dua və tövbə etməyin yolu, habelə Allaha aparan mənəvi seyrin qaydaları şirin bir tərzdə açıqlanır. Şabaniyyə münacatı qəlbi xəstəliklərin əlacı, mənəvi yüksəlişin vasitəsi sayılır.

Ərəbcə yazılışı

Tərcüməsi

İlahi! Peyğəmbərə (s) və onun soyuna xeyir-bərəkət ver; Sənə dua etdikdə, duamı eşit; Səni çağırdığımda, mənə cavab ver; Səninlə münacata gəldikdə, məni qəbul et! Axı Sənin qapına gəlmişəm, hüzurunda boyun əyib yalvarıram və qarşılıq verəcəyinə ümidliyəm. İçimdəkilərdən agahsan, arzularımdan xəbərin var, qəlbimi də görürsən. Etdiyim əməl, çatdığım yer, demək istədiyim söz, diləmək istədiyim hacət, umduğum aqibət Səndən gizli deyil. Ey mənim sahibim, ömrümün sonunadək başıma gələcək gizli və aşkar hadisələrin hamsı Sənin təqdirinə bağlıdır. Qazanacağım və itirəcəyim, xeyirim və ziyanım Sənin əlindədir, başqasının yox.

İlahi, möhtac olduğumu Sən verməsən, kim verəcək? Əlimdən Sən tutmasan, kim tutacaq? İlahi, qəzəb və cəzandan Özünə sığınıram. İlahi, rəhm olunmaq mənə layiq olmasa da, sonsuz mehribanlığınla rəhm etmək Sənə layiqdir! Özümü elə hiss edirəm sanki Sənə olan ümidimin kölgəsi altında hüzurunda durmuşam, Sən də Özünə layiq tərzdə mənimlə danışır, Öz əfvinə bürüyürsən.

İlahi, məni bağışlamağın təəccüblü deyil, axı bağışlamaqda Səndən üstünü yoxdur. Ömrümün sonu çatanda əməllərimlə Sənə qovuşa bilməsəm də, günahlarımı etiraf etməklə Sənə yaxınlaşmağa çalışacam. İlahi, o günahlarımla özüm özümə zülm etmişəm, onları bağışlamasan vay olsun halıma. İlahi, ömrüm boyu yaxşılığını məndən heç əsirgəmədin, nə olar, ölümümdən sonra da heç əsirgəmə. İlahi, ömrüm boyu Səndən xeyir gördüyüm halda, ölümdən sonra nəvazişli baxışını məndən çəkəcəyinə necə inanım?

İlahi, Özünə yaraşan tərzdə işlərimi yoluna qoy, nadanlığında boğulan mən günahkara əlini uzat. İlahi, bu dünyada günahlarımı gizlətdin, amma o dünyada faş olmamağa daha çox ehtiyaclıyam. Bu dünyada günhalarımı saleh bəndələrinə bildirmədiyin kimi, Qiyamətdə də şahidlər yanında abrımı aparma. İlahi, səxavətinə baxıb ümidlənir və görürəm ki, bağışlanmağım əməl etməyimdən daha yaxşıdır. İlahi, bəndələrin arasında qəzavət edəcəyin gün məni sevindir. İlahi, bağışlanmağa ehtiyaclı halda Səndən əfv diləyirəm deyə, üzrümü qəbul et. Ey günhakarların üzr istədiyi ən üstün kəs!

İlahi, dualarımı cavabsız qoyma, gözləntilərimi boşa çıxartma, ümidlərimi kəsmə! İlahi, alçalmağımı istəsəydin, məni hidayət etməzdin. Rüsvay etmək istəsəydin, mənə lütf etməzdin. İlahi, ola bilərmi ki, arzuma çatmaq üçün bir ömür qapına gəlim, Sən də məni cavabsız qoyasan? İlahi, bütün həmd və təriflər Sənindir! O təriflər ki, sonu yoxdur, daimidir, əbədidir, çoxaldıqca çoxalır, əsirgənmir, Sənin sevgi və razılığını cəzb edir.

İlahi, günahlarımdan tutsan, əfvindən yapışacam; qəbahətlərimdən tutsan, məğfirətindən yapışacam; cəhənnəmə atsan, ordakılara Sənə olan eşqimi elan edəcəm! İlahi, etməli olduğumdan az itaət etsəm də, Sənə olan ümidimdən gözləntim çoxdur. İlahi, rəhmətinə və xilasına qovuşmaq üçün gözümü Sənin kərəminə tikmişəmsə, qapından məhrum və əliboş qayıdacağımı necə ağlıma gətirim?

İlahi, ömrümü Sənə qarşı etdiyim səhvlərin pisliyi ilə puç elədim, gəncliyimi Səndən uzaq düşməyimin məstliyi ilə məhv etdim. İlahi, verdiyin nemətlərdən qürurlanada da, qəzəbinə doğru gedib amanda qalanda da ayılmadım ki, ayılmadım. İlahi, indi də mən - qullarından birinin övladı olan qulun, kərəm ətəyindən yapışıb qarşında durmuşam. İlahi, abır-həya bilmədən etdiyim günahlardan qaçıb hüzuruna gələn bir bəndənəm. Bağışla məni, axı Sənin kərəmin bağışlamaqla tanınır. İlahi, Sənə itaətsizlikdən qaçmağa gücüm yoxdur; yalnız Özün məni ayıldıb məhəbbətinə yönəltsən, istədiyin kimi ola bilərəm. Məni kərəm ağuşuna aldığın, qəlbimi qəflət çirkabından təmizlədiyin üçün Sənə minnətdaram. İlahi, mənə elə bax sanki çağırdığında cavab verdim, dəstəklədiyində sözündən çıxmadım.

Ey yaxın olan, barəndə səhv düşünənləri Özündən uzaqlaşdırmazsan! Ey səxavətli olan, mükafatına ümid bağlayanı məyus etməzsən! İlahi, Sənə yönəlmək üçün şövqdən alışan bir qəlb, Sənə tərəf ucalmaq üçün doğru danışan bir dil, Sənə yaxınlaşmaq üçün həqiqəti görən baxış istəyirəm Səndən! İlahi, Səninlə tanınan şöhrətsiz, Sənə sığınan xar, Sənin ağuşuna aldığın tənha olmaz! İlahi, Sənin yolunu gedən aydınlığa çıxar, Səndən yapışan nicat tapar. Mən də Sənə sığınmışam, İlahi! Ona görə də, məni Öz rəhmətindən naümid, Öz nəvazişindən məhrum etmə! İlahi, məni elə məqama çatdır ki, Sənin vilayətinə bağlı olanların arasında qərarlaşım və Səndən daha şiddətli eşq uman birisi olum. İlahi, zikrinin divanəsi olmaq üçün məni ilhamlandır, adlarından və müqəddəslik məqamından aramlıq əldə etmək üçün məni rəğbətləndir. İlahi, Səni and verirəm Özünə, məni Sənə itaət edənlərin və razılığını əldə edənlərin gözəl məqamında qərar ver. Axı nə özümü qorumağa qüdrətim, nə də bəhrələnməyə bir şeyim yoxdur. İlahi, mən Sənin zəif və günahkar qulun, Sənə üz tutmuş kölənəm. Odur ki, məni üz çevirdiyin və səhvlərini bağışlamadığın kəslərdən qərar vermə! İlahi, məni Özündən başqa hər şeydən tamamilə qopar! Qəlb gözümüzü Sənə baxmaqla işıqlandır ki, qəlbimizin baxışları nur hicablarını belə yırtsın, əzəmət qaynağına qovuşsun və ruhlarımız müqəddəs izzətinə sürətlə qovuşsun. İlahi, məni o kəslərdən qərar ver ki, onları səslədikdə Sənə cavab verdi, onlara baxdıqda əzəmətindən bihuş oldu, onlarla xəlvət söhbət etdikdə Sənin üçün aşkarda əməl etdilər.

İlahi, Sənin haqda xoş gümanıma məyusluq qatmadım, gözəl kərəmindən gözümü çəkmədim. İlahi, xətalarımla gözündən düşmüşəmsə, Səndən xeyir umduğuma xatir məni bağışla. İlahi, günahlarım lütfünün çoxluğundan məni uzaq salırsa, şəfqətinin çoxluğuna olan yəqinlik məni qaytarır. İlahi, qəflətim Səninlə görüşəcəyimi unutdurursa, sonsuz əliaçıqlığına olan mərifət məni oyadır. İlahi, verəcəyin cəzanın ağırlığı məni atəşə səsləyirsə, verəcəyin mükafatın bolluğu - cənnətə . Odur ki, İlahi, yaınız Sənə əlimi uzadır, nalə edir və can atıram! Peyğəmbərə və onun soyuna xeyir-bərəkət verməyini diləyirəm! Qoy Səni daim yad edənlərdən, əhdini pozmayanlardan, şükrünü unutmayanlardan və əmrini yüngül tutmayanlardan olum! İlahi, məni izzətinin ləzzətbəxş nuruna qovuşdur ki, Sənin tanıyım, Səndən başqalarından üz çevirim və yalnız Səndən çəkinim.


Allahın xeyir-bərəkətini, saysız-hesabsız salamları peyğəmbəri Məhəmmədə və pak Əhli-Beytə olsun.


hacishahin.az