XƏBƏRLƏR

Əyyamül-beyz və ya bəyaz günlər

18 Mart 2019 556

Rəcəb, şaban və Ramazan aylarının 13-cü, 14-cü və 15-ci günləri əyyamul-beyz, yəni bəyaz günlər adlanır. Ayın bədrlənməsi səbəbindən həmin gecələr daha işıqlı olur. Hədis və rəvayətlərdə bu gecələri ibadətdə keçirməyin əhəmiyyəti xüsusi vurğulanır.

 

Həzrət  Peyğəmbərdən (s) nəql olunan hədisdə deyilir ki, rəcəb ayının ortasında gündüzləri oruc, gecələri isə ibadətlə keçirənə dünyadan xalis tövbə ilə köçmək nəsib olar. İmam Sadiq (ə) isə bu günlərin ibadətini bir il ibadətə bərabər tutub.  

 

Hər üç gündə oruc tutmaq, qüsl almaq və sədəqə vermək tövsiyə olunur. Bu günlərdə Ümmü Davud duasını oxumaq, Salman Farsi namazını qılmaq və İmam Hüseynin (ə) xüsusi ziyarətnaməsini oxumaq da bəyənilən əməllərdəndir. Xatırladaq ki, bəyaz günlər böyük mənəvi təsirə malik etikafın saxlanılması üçün ən uğurlu vaxt hesab olunur.

 

Əyyamul-beyzin xüsusi namazı aşağıdakı qayda ilə qılınır:


13-cü gecə iki rikətli namaz qılınır. Hər rikətdə “Fatihə” surəsindən sonra “Ya Sin” , “Mülk” və “İxlas” surələri oxunur. 14-cü gecədə eyni qayda ilə dörd rikətli (iki dəfə iki rikətli) namaz qılınır. 15-ci gecə isə eyni qayda ilə altı rikətli (üç dəfə iki rikətli) namaz qılınır.

 

Rəcəb ayının 13-ü həzrət Əlinin (ə) mövlud, 15-i isə xanım Zeynəbin (s) vəfat günüdür.

 

Qeyd edək ki, bu il rəcəbin 13-cü gecəsi martın 19-u şam azanından sonra daxil olur, 13-cü günü isə martın 20-nə təsadüf edir.  

 

 

 

hacishahin.az