Bir neçə gündür ki, sosial şəbəkədə üstünə “Allah rəhmət eləsin” yazılmış tort şəkli paylaşılır. İddia olunur ki, bu, yas mərasimlərindən birində çəkilmiş fotoşəkildir.

Məsələ ilə bağlı  Qafqaz Müsəlmanları İdarəsinin (QMİ) səlahiyyətli nümayəndəsi, “Məşədi Dadaş” məscidinin imam camaatı Hacı Şahin Həsənli  Modern.az-a danışıb.

Din xadimi deyib ki,  İslamda bu kimi məsələ ilə bağlı hər hansı bir hökm və ya göstəriş yoxdur:

“Dində bu barədə qadağa olmasa da, yas mərasimlərinin özünəməxsus, yüz illərlə formalaşmış qayda-qanunları var.  Əgər insanlar tort bişirməyə gülürlərsə, bunu edən adamlar həmin əməldən çəkinsələr, daha yaxşı olar.  Çünki tort bişirilməsi yas mərasimində ikrah hissi yaradır və həmin məclis öz məğzindən çıxaraq, gülüş obyektinə çevrilir.  Mən şəxsən bu cür halları məqsədəuyğun hesab etmirəm.

Ümumiyyətlə, bu kimi məslələrdə din qəti göstərişlər vermir, məsələni  insanların öz öhdəliyinə buraxır. İnsanlar da ağılları ilə düşünüb doğru-düzgün qərar versinlər. Dinimiz ümumi olaraq deyir ki, insanlar çalışsınlar barmaqla göstəriləcək bir hərəkət etməsinlər ki, kimlərəsə özlərini güldürməsinlər. Bu cür qaydalardan çıxış edərək, insanlar müəyyənləşdirməlidirlər ki, hansı addımı atmaq olar, hansını yox”.

hacishahin.az